கல்லதுநந் தெய்வமல்லக் கண்டசிஷ்டி யாதுமல்ல
வல்லசுரர் நரர் மற்றாருமல்ல-நல்லோரே
யெல்லாருங் கேளுங்கோ ஈசாவேராசா நம்
அல்லா வொரே நபியாம்.
(இராகம்: ஆனந்த பைரவி) | (ஆதி தாளம்) |
அல்லாவொரு நபியாங்கு மோதுங்
கேடது போடுங்கோ நம் அல்லா.
சல்லாப நூலே நல்லாவியாலே
தருமனு வேலாவே. | - அல்லா |
1. எல்லாரும் வாரும் பொல்லாத பேரும்
இல்லாத பேருந்தானே
கல்லாதோராரும் நில்லாமற் சேரும்
நல்லாயனம்முட கோனே. | - அல்லா |
2. அந்தர வானுஞ் சுந்தரவுலகுந்
தந்த வொரு வன்றானே
வந்தானே நந்தாதா அவன்
சொந்தம குணன்றானே. | - அல்லா |
3. ஈசாவலா மகராசா தயாபர
வேசாறலே தினமே
மாசாலமே விய பூசாரி மார்கள்
பிசாசான பேர்சனமே. | - அல்லா |
4. பித்தர்கள் சிலைகள் முற்றிலும் வீணே
பேதமையது காணே
கற்றது மிலையோ வானவர் கோனோ
கல்லதிலிருப் பானோ. | - அல்லா |
5. செம்பதுஞ் சிலையும் நம் பரனாமோ
தேறின ஞானிக ளே
கும்பியில் விழுவீர் வம்பு செய்யாதீர்
குணப்படு மிது நாளே. | - அல்லா |
6. ஆதாரமே தவர் பாதார விந்தமே
அருயாருட சொந்தமே
தீதான பாதகர் பாதாள வீடது
சேர்வார் கணிற் பந்தமே. | - அல்லா |
7. நெல்வேலி வேதநாயகன் பாட்டை
நெடுகிலும் பாராட்டே
பல்லூழி காலம் வாழ் மோட்ச வீட்டைப்
பதிய மனத்தை நாட்டே. | - அல்லா |
(1837-வரு)
-----------------------------------
மண்டலத் திருக்குகின்ற மானிடப்பதரே நீவிர்
பண்டுதான் வணங்கி வந்த பலவித வுருக்களெல்லாம்
அண்டர் நாயகனுக் கேறா வருவருப் பென்றே நன்றாய்க்
கண்டறிந் துணர்ந்து பார்த்துக் கதிவழி சேருவீரே.
(இராகம்: தூசாவந்தி) | (ஆதி தாளம்) |
கண்டறிந்துணர்ந்து பாருங்கோ வுமைப் படைத்த
கடவுளண்டைக்குச் சேருங்கோ.
பண்டு நீர் வணங்கி வந்த
பலபல தேவதைகள்
படுத்திய ஆபத்திலுமைக்
கெடுத்து தோ இரட்சித்து தோ அதை. | - கண் |
1. காத்தவராயன் கறுப்பண்ணன்
கண்ணணூர் மாரியுங்
கல்லுக் கோட்டுச் சூரியும்
வல்ல தேகரி வீரியும்
பார்த்திருக்கக் கொண்டு போம்
பற்பல காட் டேரியும்
பங்கருளுந் தெய்வமோ வென்
றுங்கள் புத்தியின் கண்ணாலே. | - கண் |
2. காசியெம சேது மட்டுங்
கால் கடுக்க ஓடியுங்
காவடி யெடுத்துப் போய்க்
கடம்பனைக் கொண்டாடியுந்
தாசிகளையாடச் சொல்லிச்
சங்கரனைப் பாடியுஞ்
சற்றெனும் நன்மை தந்ததோ
குற்றங் குறைகள் தீர்ந்ததோ. | - கண் |
3. பிள்ளையாரைக் குட்டிக் கொண்டு
பெருமாள் கோவில் சுற்றியும்
பேயாடி போலத் திரிந்து
பேச்சியைப் பிதற்றியும்
வள்ளியை நற்றிக் கொண்டோடு
மாயாண்டியை பற்றியும்
வாணாலை மாய்த்துக் கொள்ளாதேயும்
வீணான தெய்வங்களி தாக்கும். | - கண் |
4. கண்ட கோவிற் றெய்வமென்று
கையெடுத்துப் போற்றியுங்
களிமண்ணைச் சாணியை வைத்துக்
கர்த்தா வென்று சாற்றியும்
வண்டது போற்கற்றி கற்றி
மலர் பறித்துத் தூற்றியும்
வந்த பலனே தனு முண்டோ
சிந்தையு மிரும்புக் குண்டோ. | - கண் |
5. சன்னாசி போலுத் திராட்சத்
தாவடங்கள் பூட்டியுஞ்
சாம்பலைப் பெருக்கப் பூசிச்
சடை வளர்த்து நீட்டியும்
வன்னக் காவி வேஷ்டியும்
பின்னனே கங் கோட்டியும்
வம்பைப் பாராட்டியு முன்னச்
செம்பைக் காதில் மாட்டியு மென்ன. | - கண் |
6. பட்ட ராமம் போட்டுப் போட்டுப்
பகட்டி யிட்டீரே
பாழில் ராமா ராமா வென்று
தோழிலுஞ் சுட்டீரே
மொட்டை யடித்துத் தலங்களெங்கு
முனைந்து கும்பிட்டீரே
முழுது முங்களாஸ்தியெல்லா
மோசமாய்ச் சிலவிட்டீரே. | - கண் |
7. பொங்கலிட்டாடுகள் வெட்டிப்
பூசைப் போட்டுக் கண்டீரே
போட்டியாகப் பெண்களை வைத்
தாட்டிக் கோரணி கொண்டீரே
சங்கை யற்ற சாஸ்திர
சடங்கிலே துவண்டீரே
சத்துருப் பிசாசு பண்ணுஞ்
சற்பினை யிதென்றே யெண்ணும். | - கண் |
8. இரண்டு நினை வாயிருந்து
இரண்டகஞ் செய்யாதேயும்
ஞாய மன்றி யாற்று மத்தை
நரகத்திற் சாயாதேயும்
பண்டது போற் குந்திக்குந்தி
நொண்டி நடவாதேயும்
பராபரனை விட்டு விட்டுப்
பாகாலைப் பணி யாதேயும். | - கண் |
9. எத்தனை கோவில்களுண்டோ
அத்தனை யுருவங்களும்
எண்ணிறந்த மடங்களும்
ஏரியுங் குளங்களும்
வித்தையல்லோ நெல்லை வேத
நாயகனைக் கேளுங்கோ
வெண்கலஞ் செம்புங் கருங்கல்
லுங்களி மண்ணுங் காணுங்கோ. | - கண் |
(1827-வரு)
-----------------------------------
சிந்தைத் தடுமாறித் தீ வினைக் குள்ளாகி
யெந்தவி தப்புத்தியையு மெண்ணாம-லந்தந்தோ
வான்ம யங்கா தாளுமொரு வல்ல பிதாவிருக்க
வேன் மயங்குகிறாய் மனமே.
(இராகம்: செஞ்சுருட்டி) | (ஆதி தாளம்) |
ஏன் மயங்கிறாய் மனமே
யேன் மயங்கிறாய் கான்.
மான் மயங்கிறாப் போல் | - ஏன் |
1. அந்தரவான் புவிதந்த பராபர
னாரென்ற றிவாலறி யாமல். | - ஏன் |
2. கல்லையுஞ் செம்பையு மரக் கட்டைகளையுங்
கருதி யுருகித் தடுமாறி. | - ஏன் |
3. பரா பரனோ பாகாலோ தெய்வ
மெனப் பகுத்தரிந் தேற்றாமல். | - ஏன் |
4. பராபரன் தெய்வமானால் அவரைப்
பணி பசாசானாலதைச் சேவி. | - ஏன் |
5. மனுடவ தாரஞ் செய்த பராபர
வஸ்துவே கிறிஸ் தென்றறியாமல். | - ஏன் |
6. எந்த விதத்திலு மேசுக்கிறிஸ்துவி
லிரட்சிப் படைவதைத் தேடாமல். | - ஏன் |
7. மேசியாவின் மன்றாட்டுருக்குது
வேதநாயகன் பாட்டிருக்குது. | - ஏன் |
(1849-வரு)
-----------------------------------
பாரத்து ரோகப் படுபாவி பரத்தைச்
சேரத்தரமோ திருவுளமே-சேர வைப்பாய்
மூவாளொன்றான முதல்வாவ பயமே
தேவா தேவாதி தேவா.
(இராகம்: செஞ்சுருட்டி) | (ஆதி தாளம்) |
தேவா தேவாதி தேவா நின் பாதத்தைச்
சேரத்தர மோவும் பர் தேவா
மூவா ளொன்றானயே
யோவா நின் கிருபையை
மூடனு ணர்வேனோ தேவா தேவா. | - தேவா |
1. அண்ட புவனங்க
ளனந்த சராசரங்க
ளெண்டிசையும் படைத்த தேவா தேவா
கண்ட உருவங்களைத்
தெண்டனிட்டே தொழுவோர்
கடத் தேறக் கூடுமோ தேவா தேவா. | - தேவா |
2. பத்தியறி விலாத
சத்துருப் பிசாசின் மக்கள்
பரம பதம் சேர்வாரோ தேவா தேவா
எத்தனை யானாலுஞ்
சித்த மிரங்கி யெமை
யிரட்சிக்க வந்த யேசு தேவா தேவா. | - தேவா |
3. ஆதியின் முன் பாவே
வேதநாயகன் பாவே
அன்பா நண்பா கண்பார் தேவா தேவா
சாதியனைத் துங்கைவி
டாது தற் காப்பாயே
சத்திய கிறிஸ்துவே மெய் தேவா தேவா | - தேவா |
(1851-வரு)
-----------------------------------
கத்தரருளிச் செய்தகற் பினைகளைத் தவறிப்
பத்தியிலா தொழுகும் பாவ நரரள் - முத்தப்
பிறந்தும் விருத்தமே பேதையர் சென்ம
மிறந்தும் வருத்தமே யென்க.
பிறந்தும் வியர்த்தமாச்சே புவியிற் சென்ம
மிறந்தும் வருத்த மாச்சே
1. சிறந்த சத்திய வேத
மறிந்தும் நரக வழி
திறந்து பரா பரனை
மறந்து திரியுஞ் சென்மம் | பிறந் |
2. கருத்தருரைத்த பத்துக்
கற்பினைகளை மீறி
மெத்தக் கெறுவங் கொண்டு
விழுந்து கிடக்குஞ் சென்மம் | பிறந் |
3. உலகம் படைத்த கர்த்த
னொருவனெனச் சொலியும்
பல பல தேவர்களைப்
பணிந்து திரியுஞ் சென்மம் | பிறந் |
4. வானத்தின் சேனைகளை
மண்ணிலுள்ள வஸ்துக்களை
யீனப் பசாசுகளை
யேற்றி வணங்குஞ் சென்மம் | பிறந் |
5. ஆணை சத்தியங்கள் பண்ணி
யச்சயன் தேவ நாமத்தை
வேண விதங்களாக
வீணில் வழங்கும் சென்மம் | பிறந் |
6. கருத்தரி னோய்வு நாளைப்
பரிசுத்தம் பண்ணாமல்
விருத்த மாக்கிப் பல
வேலைகள் செய்யுஞ் சென்மம் | பிறந் |
7. தகப்பனை மாதாவைச்
சங்கித்து வாழ் காம
லகத்திற் கெறுவங் கொண்
அசட்டை செய்யுஞ் சென்மம் | பிறந் |
8. உலைய மனுடரி
னுதிரஞ்சிந்தப் படக்
கொலை செய்யும் பொல்லாத
கொடும் பாதக சென்மம் | பிறந் |
9. அப காரத்திலய
லான் மனையைத் தழுவும்
விபசாரத்தினத்தின்
வேசித்தனச் சென்மம் | பிறந் |
10. உளவு செய்து பிற
ருடைமைகளைத் திருடிக்
களவு செய்யும் பொல்லாக்
கடை கெட்ட பாவச் சென்மம் | பிறந் |
11. மெய்ச் சாட்சிகள் சொல்ல
வேண்டும் பிறனுக் கெதிர்ப்
பொய்ச் சாட்சிகள் சொல்லிப்
பொரியும் புலையர் சென்மம் | பிறந் |
12. தடுத்துத் தடுத்து மறை
சாற்றியென சொலியும்
அடுத்தவன் வீட்டை யிச்சித்
தலையுங் கொடிய சென்மம் | பிறந் |
13. அயல் மனை சேடன் சேடி
எருது கழுதை மற்று
மயல் பிடித்திச் சித்து
மயங்கித் திரியுஞ் சென்மம் | பிறந் |
14. எல்லாத்திலுங் கதிக்க
எந்தை பராபரனை
நல்லாய்ச் சிநேகியாத
பொல்லாத வீண் சென்மம் | பிறந் |
15. தன்னைப் போற்றன் பிறனைத்
தக்கபடி நேசியாமற்
பின்ன பேதகஞ் செய்து
வின்னமாய்ப் பேசுஞ் சென்மம் | பிறந் |
16. நெல்லை வேதநாயகன்
நித்திய சங்கீர்த்தனஞ்
சொல்லி பராபரனைத்
தொழுது கொள்ளாத சென்மம் | பிறந் |
(1849-வரு)
-----------------------------------
ஞானிகளே வேதமெல்லாம் நன்றாய் யறிந்தவவ
தானிகளேயோர் வசனஞ்சாற்றுங்கோ-வானளிக்கும்
நன்மை பராபரனை நாடிச்செபஞ் செய்யாச்
சென்ம மேதுக்குத் திறம்.
சென்மமேதுக்குச் செபஞ் செய்யாச்
சென்ம மேதுக்குத் தவஞ் செய்யாச்
சென்ம மேதுக்கு.
1. நன்மைப் பிரவாகர
ஞானச் சொரூபத்தை
யுண்மையினாலே
யுணர்ந்து வணங்காத | சென்ம |
2. வானம் புவியு
மகிழ்ந்து படைத்த மெஞ்
ஞானப் பிரகாசத்தி
நன்றி யறியாத | சென்ம |
3. தேடிப் பரா பரன்
பாதத்தைச் சிந்தித்து
நாடித் தினந் தினம்
பாடித் துதியாத | சென்ம |
4. எங்கும் நிறைந்த
பரா பரனில்லை யென்
றங்ககங் கொண்டெங்கு
மலைந்து திரிகின்ற | சென்ம |
5. இயாவு மறிந்து
நடுத்தீர்க்க வல்லவோர்
தேவனுண்டென்றுளஞ்
சிந்தனை செய்யாத | சென்ம |
6. தன்னைப் படைத்த
சருவேசுரன்றன்னை
யுன்னி யுணர்ந்து
வுகந்து கொண்டாடாத | சென்ம |
7. மோசப் பிசாசை
முழுவதும் நம்பியே
யேசுவினா மத்தி
லீடேற மாட்டாத | சென்ம |
8. ஆவியினா லுண்மை
யாலும ரூபியாஞ்
சீவப் பிரானைத்
தியானித்துப் போற்றாத | சென்ம |
9. மோகக் கடலில்
முழுகி மயங்கியே
யேக பராபர
வஸ்துவை யேத்தாத | சென்ம |
10. உத்தம சத்திய
வேதத்தினுண்மையைப்
புத்தியினாற் கண்டு
போற்றிக்கைக் கொள்ளாத | சென்ம |
11. எத்தனை நீதிகள்
வேதங்கள் கற்றாலும்
பத்தியுந் தேவ
பயமு மில்லாத வீண் | சென்ம |
12. மாயப் பிசாசின்
மருளற மெய் வேத
நாயகன் பாடிய
நாதனைத் தேடாத | சென்ம |
(1849-வரு)
-----------------------------------